Zierre baserria.

Zeharka dagoen baserria, besteak “zuzen” dauden bitartean.

Oma, ehundaka urte dituela inork gutxi asma lezake egungo itxura ikusita. Eraberrituta, guztiz bukatu gabe zegoela estrenatu genuen.

Bestetik Zubiri, 110 urte bete berri dituen familia negozioa.

Zubiri, zu bi, zubi.

Kasualitateko izen nahastea izan zen, beharrizanak eta momentuko okurrentziak deituta.

Zubiri ta Zierre, Zierre eta Zubiri. Bi zeta.

Zer Zara Zu?

Indibiduo bezala ez dakit, baina kolektibo bezala Arriguri gara orain. Hirugarren erpina. Alfabetoko letra guztiak utzi ditugu kanpoan, azkena eta lehenengoa baino ez. A Z. Z A.

AZkura ZAhar bat dut.

Norak proposatu zigun bere familiakoa izan den proiektu Zaharra gure Asiberriarekin nahastea. Berritzen joan den zaharra eta zaharrera ere begira dagoen berriaren arteko zubia.

Kanpoaldean egitekoa ginen argazki sesioa, Mundakako Santaklara inguruan. Norak proposatu zigun lekua bainujantziak eta barruko arropak ateratzeko aproposa izan zitekelakoan. Apirilean egin genuen eta esaerari kasu, euri hilea izaten ari zen.

Nire lana izan zen leku babestua bilatzea eta Arrate pabiloia deskartatu ostean, nire izeko berrizten ari zen baserriaz gogoratu nintzen.

Azkenean babeslekua genuen arren, eguzkia baino ez genuen izan. Hor duzue emaitza, argazkiak eta bideoa.

_Hasier (@h.goiko)